Na Filozofskom fakultetu u Beogradu u petak uveče došlo je do incidenta na tribini o LGBT migrantima u Londonu i Parizu. Na tribinu su upala petorica muškaraca, predavanje je prekinuto na više od sat vremena, a incident je završen dolaskom policije koja je izvela mladiće.
Petorica mlađih muškaraca, predstavljajući se kao srpski nacionalisti, upali su na predavanje profesora Ričarda Mola i prekinuli ga. Insistirali su da svi napuste amfiteatar, a pošto su studenti to odbili, sjeli su na katedru i na taj način spriječili izlaganje o LGBT migrantima.
Profesor Ričard Mol nije bio previše zabrinut: “Ovo je prvi put da mi neko prekine predavanje iz protesta, pošto ne govorim srpski nisam razumio šta govore, ali po tonu i majicama mi je bilo jasno da hoće da me prekinu. Pošto je bilo samo njih pet, a nas pedeset, nisam se previše loše osjećao, a moji domaćini su stali između nas. Nisam ih ništa razumio pošto ne govorim srpski, ali mogu samo da zahvalim mojim domaćinima što su me zaštitili.”
Skoro sat vremena trajalo je ubjeđivanje između studenata i mladića kako bi se predavanje nastavilo. Poslije sat vremena pojavila se policija koja je zatražila da oni koji nisu bili tu na početku predavanja napuste prostoriju i petorica mladića su ih odmah poslušala, pa je tribina nastavljena oko 19.30. Protiv mladića biće podnijete prekršajne prijave.
Izvor i foto: N1 Info
